Міністэрства культуры раскрывае «заслону таямніцы»!
Што адбываецца за сценамі прыгожага сучаснага будынка непадалёк ад кінатэатра "Кастрычнік"?
А за сценамі - будаўнічыя работы! У хуткім часе маштабны будынак стане паўнацэнным навучальным корпусам, які складаецца з двух блокаў, і прымыкаючым інтэрнатам Мінскага дзяржаўнага мастацкага каледжа імя А. К. Глебава.
Міністр культуры Анатоль Мечыслававіч Маркевіч разам з намеснікам Сяргеем Аляксандравічам Саракачом наведалі сёння аб'екты будаўніцтва і асабіста пераканаліся ў стадыях і якасці іх падрыхтоўкі.
У адным з блокаў навучальнага корпуса размесцяцца актавая і спартыўная залы, навучальныя класы, кабінеты і майстэрні аддзяленняў жывапісу і дызайну, адміністрацыйная частка, бібліятэка, буфет.
У іншым блоку - майстэрні скульптараў і жывапісцаў, памяшканні для апрацоўкі каменя.
На тэрыторыі каледжа таксама з'явяцца альтанка і пляцоўка з калонамі - крэатыўная зона адпачынку для навучэнцаў, і месца для пленэру!